O Concello de Salceda de Caselas ven de poñer en marcha a nova área de autocaravanas recentemente construída nas inmediacións da Senda Fluvial do Río Landres “Francisco Estévez Martínez”. O acto de posta en funcionamento estivo coordinado pola Asociación Galega de Autocaravanas, que estivo representada por diferentes membros da mesma, e coa asistencia do seu presidente Paco Pena. No acto estiveron tamén presentes o Alcalde Marcos Besada e varios concelleiros/as da corporación. A petición da propia Asociación de Autocaravanas, déixase pendente a inauguración oficial para máis adiante, xa que son moitas as áreas que se están a poñer en marcha e procúrase que non haxa coincidencia de datas neste tipo de eventos con outros Concellos.

A área, realizada co asesoramento da Asociación, conta con tódolos servizos precisos para este tipo de vehículos (evacuación e carga de auga…), e foi definida polo presidente Paco Pena como “unha das mellores de toda Galicia”. Trátase da área número 98 de Galicia, convertendo xa a nosa Comunidade Autónoma en referente neste tipo de instalacións.  A ubicación da mesma foi tamén establecida pola súa idoneidade, xa que está cerca de establecementos hosteleiros e supermercados, ademáis de estar ao lado do Parque da Gándara, as Piscinas Municipais e a Senda do Río Landres.

Loli castiñeira, Concelleira de Turismo: “hoxe damos un pasiño máis no noso camiño de converter a Salceda como punto importante de visitas que están xa a chegar dende moi diversos puntos do País. Salceda está xa á altura de moitas outras vilas e cidades con este tipo de servizos de primeira categoría”.

Marcos Besada, Alcalde de Salceda: “Seguimos a construír a nova Salceda e a ofrecer novos servizos. Construímos unha vila na que vivir, traballar e disfrutar, pero tamén unha vila aberta e acolledora para todo aquel que se queira achegar a coñecernos”.

 

Gabinete de prensa, 28 de marzo de 2015