Esta senda ten unha lonxitude de 2.014 metros, entre a zona de As Pontes (Santa María) e o Rubal (A Picoña), e durante o seu percorrido á beira do río Caselas podemos atopar os muíños das Covas, A Laxe, Filgueiras e Marcial.

Con este espazo dótase á poboación dun entorno para gozar de todo o potencial do patrimonio etnográfico do noso Concello, facendo unha clara posta en valor dunhas construccións tan especiais como son os muíños e do seu entorno máis p´roximo, ofertando alternativas de ocio para a poboación.

O muíño da Laxe ou dos Cregos rehabilitouse por completo e púxose en funcionamento tras anos de abandono. Así mesmo habilitouse como aula didáctica onde, a través de paneis informativos, se dá a coñecer a riqueza destes elementos singulares do noso patrimonio vinculados ao río Caselas e tamén do conxunto dos 56 muíños catalogados en todo o Concello.

Esta senda de 1.375 metros de lonxitude enlaza no lugar de As Pontes coa Senda do Río Caselas, estendéndose ata o lugar de As Regadas e ofrecendo deste xeito un total de 3.557 metros de senda no marco natural da ribeira do Río Caselas. Ademais conecta coa recén recuperada Fonte das Carballas, cruzando a estrada Carrasqueira-Cabreira, servindo así de conexión peonil co cas co urbano.

A senda, bautizada co nome de Valentín Paz Andrade, conta con un espazo adicado a este polifacético escritor.

No seu percorrido atopamos o Palomar de Antero, construído nos anos 60 por Álvaro Antero Pérez Troncoso.

Esta senda, de 839 metros de lonxitude que une a zona da Gándara co barrio do Torrón, leva o nome de Francisco Estévez, pai do coñecido actor Martin Sheen, natural da parroquia de Parderrubias.

A senda agocha o conxunto etnográfico máis completo do Concello de Salceda, formado polo muíño e lavadoiro do Seixo e os muíños do Ghurito, do Medio, do Buraco e das Laxes do Torrón. 

Actualmente o único muíño sen reconstruír é o Muíño do Buraco, que conserva aínda a configuración inicial coa que foi construído antes do 1752. O seu estado actual pode servir como exemplo ilustrativo da situación na que se atopa unha parte moi importante do patrimonio material e histórico de Galiza.

Este tramo enlaza coa senda Francisco Estévez entre O Seixo e o Muiño da Pereira, inluíndo un panel de recordo dos terribles incendios de outubro de 2017.

Nesta ocasión trátase dun tramo de 789 metros que, ao igual que os tramos anteriores, está perfectamente acondicionada para persoas con discapacidade. Durante o percorrido instalaranse diversos bancos, así como a pertinente sinalización no principio e final da senda coas limitacións de uso da mesma.

Neste caso recuperouse unha zona en estado de abandono para usos recreativos, aproveitando o entorno na marxe do Río Landres, que dá continuidade ao tramo de senda xa existente entre O Torrón e O Seixo, e enlaza tamén coa Senda da Lagoela a escasos metros. 

Esta senda enlaza os muíños de Bernárdez e dos Herdeiros coa Ponte da Pereira, pasando pola Ponte do Picado, con unha lonxitude de 1 km. Ademais pódese continuar pola senda que a comunidade de montes de Arantei (Salvaterra de Miño) fixo na súa parroquia. 

No seu percorrido atopamos o muíño do Picado, único de tres moas en todo o Concello.

Foi o primeiro tramo de senda que se executou no Concello no ano 2010, dando inicio a unha serie de sendas polos regatos e ríos de Salceda que se teñen convertido xa en referente na zona.