Con máis de 130 anos de historia, o entroido de Salceda de Caselas converteuse nun dos máis emblemáticos da provincia de Pontevedra, atraendo a visitantes de todas partes a gozar do histórico enfrontamento entre A Feira e Castro Barreiro. O luns de Entroido os dous barrios celebran cadansúa verbena de disfraces que se ten convertido xa en referencia en toda a contorna, e á que acuden centos de persoas nunha noite máxica que anuncia o gran enfrontamento que cada ano se produce o martes de Entroido (festivo local). É precisamente o martes cando os dous barrios sacan a «artillería pesada» das súas carrozas e comparsas, reeditando o seu enfrontamento ano tras ano no entorno da Praza do Concello e posteriormente no cruceiro de Fonte da Pedra, onde ámbalas dúas comparsas se despiden ata o vindeiro ano.

Dende fai anos vén cobrando tamén grande importancia o Entroido tradicional coa recuperación do rancho de Entroido e os cabaleiros que ten feito o barrio da Feira logo de décadas desaparecido, e que cada domingo de Entroido pola mañá reaparece nas rúas da vila.

Sen dúbida este histórico enfrontamento é responsable tamén do nivel que leva acadado o desfile de carrozas e comparsas que cada domingo de entroido se celebra polas rúas da vila, e que reúne a milleiros de persoas nun dos desfiles máis multitudinarios da contorna, no que participan agrupacións tanto de Salceda como de outros Concellos.