SANTA MARÍA DE SALCEDA

A Igrexa de Santa María de Salceda está construida sobre unha planta de cruz latina, con fachada franqueada por pilastras e torre campanario de tres corpos decorada con placas. Nos laterais están as capelas, situadas unha a cada lado da ábsida, sendo esta máis alto que a nave.

Fronte á fachada, á nosa dereita destaca unha fermosa oliveira, Olea europea, árbore moi vencellada aos usos litúrxicos e cotiá nos adros das igrexas.

Este templo foi reedificado no ano 1768 sobre a nave dunha antiga igrexa e mosteiro medieval fundado no ano 914 pola raiña Aragonta González, esposa do rei Ordoño,  que constituíu este mosteiro despois de ser repudiada polo seu esposo.

É unha obra artística de estilo Toscano, con torre lateral á que se accede a través dunha escaleira exterior. Destaca a porta norte de acceso ao interior do templo, tamén coñecida como a Porta da Raíña, que recibe ese nome en memoria de Aragonta.

A súa fachada occidental preséntase apilastrada no lado sur, mentras no norte apóiase directamente contra a torre. No centro a porta principal, moldurada e acobadada nas esquinas.

A torre é de base cadrada e ten dous corpos. Está apilastrada nos catro esquinais.

O retablo maior céntrase no paramento leste do presbiterio, non ocupándoo en toda a súa anchura. Levántase sobre un sotobanco quebrado, con pilastras laterais e catro na parte central, as máis exteriores decóranse con marmoreados en tonos verdes e as interiores en ocres. Así dividen o frontal en tres partes, máis ampla a central, con fondo plano en verde e debuxo floral en dourados.