O peto é de tipo aberto con tellado a dúas augas, situado a uns poucos metros do cruceiro. Posiblemente estivese anos atrás coroado por unha cruciña. Perdida a cruz, houbo un tempo no que lle colocaron unha figuriña, que tamén partiu ou roubaron, un San Antonio de Padua encaixado na pedra aparecía por riba do retablo. Actualmente atópase coroado por un meniño de pedra artificial,  espido.

Construído en mármore. amosa á Virxe do Carme co neno no colo sobre unha gran nube. Por debaixo aparecen tres ánimas entre as lapas.

Antigamente aparecía gravado por debaixo do fornelo un texto que agora loce nunha placa de mármore e pon:

A DEVOCIÓN DE

JUAN  ANTONIO GARCIA SESTELO

AÑO    1904

RESTAURADO EN  1998

 Juan Antonio Garcfa Sestelo, veciño de Salceda de Caselas, mandou facer o peto en 1904, en agradecemento as Benditas Animas do Purgatorio que intercederon ante Deus na súa súplica por recuperar a saúde, xa que estaba postrado no leito, queixado dunha gravísima doenza da  que os médicos non o  daban sanado. A partir desas curacións, tidas por milagreiras en toda a bisbarra, as augas da Fonte da Pedra adquiriron unha grande sona, xa que delas beberon as persoas desafiuzadas polo doutores.

Peto de tipo pechado, que semella bastante vello . Apoiado sobre a base cúbica que sostén unha cruz de pedra, cadrada e sen desbastar, composta de dous elementos: o varal e mailos brazos co tope. Na parte baixa amasa un fornelo rectangular, arqueado por riba.

Actualmente luce un retablo policromado, coa Virxe do Carme na banda esquerda sobre cabeciña de anxo e na dereita unha custodia, sostida por outra cabeciña de anxo. Por debaixo destas imaxes vense dúas ánimas entre as lapas en actitude orante.

Ten reixa protectora fixa e caixón de esmolas, aínda que sen porta de ferro.

Non se ten datos do seu ano de construcción pero sabemos da súa existencia xa no ano 1921.