Parque Etnográfico Muíños do río Landres

O Parque Etnográfico dos Muíños do Río Landres repártese ao longo dos 839 metros de lonxitude da senda fluvial Francisco Estévez, que une o casco urbano co barrio do Torrón, na parroquia de Entenza.

A senda agocha o conxunto etnográfico máis completo do Concello de Salceda, que está formado por:

1. – Muiño do Seixo
2. – Lavadoiro do Seixo
3. – Muíño do Ghurito
4. – Muíño do Medio
5. – Muíño do Buraco
6. – Muíño das Laxes do Torrón

Os cinco muíños son muíños de herdeiros de canle e unha soa moa, e salvo o muíño do medio, os demais aparecen citados no catastro do Marqués de Ensenada de 1752.

O lavadoiro e os muíños do Seixo e do Medio sitúanse na parroquia de Parderrubias, mentres que os muíños do Buraco e das Laxes do Torrón pertencen á parroquia de Entenza. O Muíño do Ghurito está ubicado entre as dúas parroquias.

Actualmente o único muíño sen reconstruír é o muíño do Buraco, que conserva aínda a configuración incial coa que foi construído antes do 1752. O seu estado actual pode servir como exemplo ilustrativo da situación na que se atopa unha parte moi importante do patrimonio material e histórico de Galicia.